Vocabulariu de Santuyano (Mieres)

Xosé Miguel Suárez Fernández
Xente de casa, 12

ISBN: 978-84-8053-726-1

14 x 21 cm || 200 páxs. || PVP: 12 €
 
Xosé Miguel Suárez Fernández (Mántaras - Tapia, 1965) ye filólogu, historiador y espertu en Filoloxía Asturiana. Publicó en revistes especializaes mediu centenar d’artículos sobre cuestiones llingüístiques, históriques, etnográfiques y lliteraries, amás d’impartir cursos pa la formación de profesoráu. Centráu sobre manera nel estudiu del gallego-asturianu, ye autor de llibros d’investigación como Vocabulario de Mántaras (Tapia) (1996), ¡Xa chegan Os Quirotelvos! (2006), Unde letras falan. Antoloxía da poesía en galego-asturiano (2006) o El «Teatro Aldeano» da Biblioteca Popular Circulante de Castripol (1929-1934) (2009). Fixo la traducción al asturianu d’una quincena d’obres tanto pal públicu adulto como pa lo más mozo, amás de dedicase bien d’años a la corrección de testos, ente ellos nel selmanariu y diariu dixital Les Noticies.

Vinculáu familiarmente a Santuyano, l’autor ufierta nesta obra más de 3.000 entraes con términos d’esta parroquia de Mieres, apuntaos poco a poco a lo llargo de cuasi venti años en conversaciones y encuestes directes. Amás de les palabres, en cada entrada recuéyense exemplos y munches frases feches, locuciones, refranes y respuestes humorístiques usaes o recordaes pola xente de Santuyano. Concebíu como una contribución al conocimientu del léxicu del asturianu, esti Vocabulariu de Santuyano (Mieres) ye un testimoniu más de la riqueza y tamién de la resistencia a desapaecer que tien la llingua asturiana, mui viva entá nos valles mineros. Palabres a barullu, a magüeyu, a trompón, a retorcer, asgaya, a maza, a pastu... pa lleeles, pa recordales, pero, sobre manera, pa nun dexar d’usales.

Mercar el llibru.