jueves, 18 de marzo de 2010

Castilletes mineros de la Montaña Central Asturiana

José Luis Soto
17 x 24 cm

144 págs.

Los castilletes mineros miren pal cielu, pero tán bien afitaos na tierra. Na tierra llento d’Asturies. De les sos coraes el ser humanu sacó demientres años tonelaes de carbón y otros minerales. Homes, muyeres, nenos y animales trabayaron duro por elles pa ganar el pan escaso de cada día y, de regalu, davezu, la enfermedá y la muerte.

Anguaño son poques les mines que se caltienen abiertes, pero los castilletes siguen alcordando’l pasáu de la que miren pal futuru. Dellos medio esbarrumbaos, otros ferruñosos y rodiaos de bardiales. Munchos, tamién, puxando por siguir siendo útiles, reclamando xera: testigos silentes d’otros díes, son güei testimoniu privilexáu d’una dómina heroica y negra que, puestos en valor, pueden ser quien a da-y a Asturies dalgo de la riqueza perdida col pieslle de les esplotaciones mineres.

Caltener estos resclavos del pasáu ye xera qu’han d’asumir les instituciones, pero tamién la sociedá asturiano.

Como padrimoniu industrial de gran valir, los castilletes mineros esperen la oportunidá d’amosase a quien viaxe a estes tierres d’orbayu y verde, de castañales y peñes calices, arguyosos del so pasáu y sabiéndose parte importante de los díes por venir: construyir rutes turístiques que los xunten ente la mirada plasmada de quien los ve per vez primera, illuminar la so fisionomía de xigantes de fierro, abellugar espectáculos o representase a sigo mesmos... Too, menos querer morrer como molinos vencíos pol tiempu y el ferruñu.

No hay comentarios:

Publicar un comentario en la entrada